“मर्यादित व्यवसाय र प्रविधिमा सहकारी” भन्ने नाराको साथ चैत्र २० गते सम्पन्न ६५औं राष्ट्रिय सहकारी दिवसको अवसरमा काभ्रेको बनेपास्थित बुडोल सामुदायिक साकोसले विविध कार्यक्रमहरु गरेको छ । सहकारी दिवसको सन्दर्भमा धुलिखेलमा मनाईने १२ वर्षे हरिसिद्धि जात्राको अवसरमा चैत्र १९ र २० गते संस्थाले बनेपा हेल्थ केयरको प्राविधिक सहयोगमा निःशुल्क खानेपानी एवं मास्क वितरण तथा सुगर (मधुमेह) र ब्लड प्रेसर जाँच शिविर सम्पन्न भयो । जसमा २५५ जनाले उक्त परीक्षण गराई स्वास्थ लाभ लिनु भएको थियो ।

त्यस्तै चैत्र २० गते विहान संस्थाले आफ्नो सामाजिक उत्तरदायित्व वहन अन्तर्गत धार्मिक तथा साँस्कृतिक महत्वका केहि मठ–मन्दिरहरुमा फोहोर ब्यवस्थापनको लागि कुहिने तथा नकुहिने फोहोरको लागि छुट्टा छुट्टै डस्टविन २ थान र १ थान स्ट्याण्ड सहितको डस्टविन १÷१ सेट सम्बन्धित मन्दिर ब्यवस्थापन समितिलाई हस्तान्तरण गरियो । धुलिखेलको गौखुरेश्वर मन्दिर, बनेपाको चण्डेश्वरी मन्दिर तथा नैमिषारण्य संस्कृत गुरुकुलम् र नालाको उग्रचण्डी, करुणामय, मनकामना र शुभचामुण्डा मन्दिरहरुमा उक्त डस्टविन सेट वितरण गरिएको थियो । 

सोही दिन बेलुका ३ बजे संस्थाको मुख्य कार्यालयमा सहकारी दिवसकै अवसरमा सदस्य सम्मान तथा दिपावली कार्यक्रम आयोजना गरिएको थियो । सो कार्यक्रममा संस्थाको २३औं वार्षिकोत्सव कार्यक्रमबाट घोषित विभिन्न विधामा उत्कृष्ट हुन सफल सदस्यहरु तथा कर्मचारीहरुलाई नगद, दोसल्ला र प्रशंसापत्र सहित सम्मान गरियो । साथै सो अवसरमा संस्थाबाट आयोजित रक्तदान कार्यक्रममा ५, १० र १५ पटक रक्तदान गर्नुहुने रक्तदाताहरु र स्वास्थ्य क्षेत्रमा महत्वपूर्ण सहकार्य गर्ने बनेपा हेल्थ केयरलाई समेत सम्मान गरिएको थियो ।