नेपाल बचत तथा ऋण केन्द्रीय सहकारी संघ लि. (नेफ्स्कून) को आयोजनामा Nepal Financial Reporting Standard (NFRS) को ३ दिने आवासीय  तालिम नगरकोटमा २०७८ फागुन २५ गतेबाट शुरु भएको छ । १ अर्ब भन्दा माथि वासलात भएका संस्थाहरुमा Accounting Standard Board, Nepal , ले Full NFRS कार्यान्वयनमा ल्याउने प्रावधानसँगै वित्तीय सहकारीहरुमा पनि कार्यान्वयनमा लैजान यस तालिमको आयोजना भएको हो । २० वटा साकोसहरुबाट प्रमुख कार्यकारी अधिकृत एवं उच्च व्यवस्थापनका कर्मचारीहरुको सहभागिता रहेको यस तालीमको सहजकर्ता सि.ए. प्रबिन बराल रहनुभएको छ । 

तालिम कार्यक्रमको उद्घाटन गर्दै संघका अध्यक्ष परितोष पौड्यालले नेपालको साकोस अभियान अन्तर्राष्टिय स्तरमा पहिचान बनाउन सफल भएको र गुणस्तर सुनिश्चितता कार्यक्रम एक्सेसमा आवद्ध संस्थाहरुले पठाउने प्रतिवेदनमा Disclaimer को रुपमा NFRS अनुरुपको प्रतिवेदन नभएको उल्लेख हुँदा अन्तर्राष्टिय फोरमहरुमा हाम्रा उपलब्धिहरुलाई प्रतिवेदनमार्फत सार्वजनिक गर्दा बुझाईमा जटिलता हुने गरेको स्मरण गर्दै अब यी जटिलताहरु समाप्त हुने विश्वास व्यक्त गर्नुभयो । हाल प्रचलनमा रहेको लेखामान र NFRS मा देखिएका भिन्नताहरुलाई कानुनी रुपमा सम्बोधन गर्नुपर्ने विषयहरुमा विभागसँग छलफल गरी निष्कर्षमा पुग्न नेफ्स्कूनले पहलकदमी लिने समेत बताउनुभयो ।