भक्तपुर । बंगलामुखी बचत तथा ऋण सहकारी संस्था लि. वालकोट, भक्तपुरको आयोजनामा बागमती क्लष्टर चौथोको छैंठौं कार्यकुशलता तथा सिकाई व्यवस्थापन कार्यशाला सम्पन्न भएको छ । नेफ्स्कूनको प्राविधिक सहयोगमा पुस १६ गते भएको उक्त कार्यशालाका प्रमुख अतिथि संघका प्रमुख कार्यकारी अधिकृत प्रकाश प्रसाद पोखरेल रहनुभएको थियो । काभ्रे, काठमाडौं, भक्तपुर र ललितपुरका १०  साकोसबाट २७ जनाको उपस्थिति रहेको कार्यशालको अध्यक्षता आयोजक संस्थाका अध्यक्ष विवेक श्रेष्ठले गर्नुभएको थियो । कार्यक्रम सहजीकरण नेफ्स्कून कार्यक्रम अधिकृत कोमल राज अधिकारीले गर्नुभएको थियो ।

प्रमुख अतिथि नेफ्स्कूनका सीईओ पोखरेलले एउटा ग्रील वर्कशपको उदाहरण दिदै फलामको छडबाट वर्कशपमा राम्रा वस्तु निर्माण गरेजस्तै PALM कार्यशालाबाट पनि गुणस्तरीय साकोस निर्माण गर्न सकिने बताउनुभयो । संस्थाहरुले रणनीतिक व्यावसायिक योजना निर्माण गर्दा वृद्धिको रणनीति, बिस्तारको रणनीति, संजाल सहभागिताको रणनीति, वस्तु तथा सेवाको रणनीति लगायत ६ ओटा रणनीतिहरु समावेश गनुपर्ने भन्दै उहाँले ती रणनीतिहरु प्रोबेसन कार्यक्रमको म्यानुअलमा समेत समावेश भएको उल्लेख गर्नुभयो ।

नेफ्स्कूनका सीईओ पोखरेलले साकोसहरुले आफ्ना सदस्यहरुको बचतको सुरक्षाको निम्ति अनिवार्य रुपमा PEARLS मापदण्ड अनुसारको जोखिम कोषको व्यवस्था गरेर जानुपर्नेमा जोड दिनुभएको थियो । बचत तथा ऋण सहकारीहरुको स्थिरिकरण कोष सुरक्षा कवच भएकाले सबै साकोसहरुलाई कोषमा सहभागिताका लागि आव्हान समेत उहाँले गर्नुभयो । नेफ्स्कूनले केन्द्रीय तरलता कोषको स्थापन गर्न लागेको बताउँदै सीईओ पोखरेलले उक्त कोषमा आफ्नो साकोसको तरलताको निश्चित रकम जम्मा गरी सहभागिताको लागि अनुरोध गर्दै त्यसले साकोसहरुमा तरलता व्यवस्थापनमा सहयोग पुग्ने जानकारी गराउनुभयो । वर्तमान अवस्थामा देखिएको तरलता संकटको अवस्थामा सजगता अपनाउँदै केन्द्रीय संघमार्फत कारोबार गर्न समेत सीईओ पोखरेलले आव्हान गर्नुभएको थियो ।