काठमाडौं । जिल्लाको बचत तथा ऋण सहकारी संस्थाहरुको छाता संघको रुपमा रहेको सिन्धुली बचत तथा ऋण साहकारी संघको १४औं बार्षिक साधारणसभा मंसिर २५ गते शनिबार सिन्धुलीमाढीमा सम्पन्न भएको छ ।

संघकी अध्यक्ष बालकुमारी श्रेष्ठ ( बिमला) को सभापतित्व र जिल्ला समन्वय समिति सिन्धुलीका प्रमुख शंकर राज तिवारी वर्माको प्रमुख आतिथ्यमा सभाको उद्घाटन भएको थियो । 

प्रमख अतिथि बर्माले सहकारी अभियानलाई क्रियाशिल र सुव्यस्थित बनाउँदै अगाडि बढ्ने दौरानमा आफ्नो व्यक्तिग तथा संस्थागत साथ सहयोग रहने प्रतिवद्धता व्यक्त गर्नुभएको थियो । 
त्यसैगरी संघको विकास र प्रवर्धनका लागि सञ्चालकहरु क्रियाशिल र अझ सशक्त ढंगले लाग्नुपर्नेमा सहभागी बक्ताहरुले जोड दिनुभएको थियो । 

संघको अध्यक्षबाट संस्थाको प्रगति प्रतिवेदन, लेखा सुपरीवेक्षण समिति संयोजक शम्भुप्रसाद गजुरेलबाट लेखा समितिको प्रतिवेदन  र कोषध्यक्ष कृष्णहरि कोइरालाबाट आर्थिक वर्ष २०७७/०७८ को कारोबार विवरण प्रस्तुत गर्नुभएको थियो । संघले गत आ.ब.मा करिब १ करोड ८९ लाख २५ हजार बराबरको कारोबार मार्फत रु २ लाख ८३ हजार खुद नाफा गर्न सफल भएको प्रतिवेदनमार्फत प्रस्तुत गरिएको थियो ।     
  
संघमा आबद्ध जिल्लाका ७३ बचत तथा ऋण सहकारी संस्थाहरु मध्येबाट सभामा ४० बचत तथा ऋण सहकारी संस्थाका प्रतिनिधिहरुको उपस्थिति रहेको थियो ।  

संघले यस वर्ष विभिन्न विधामा उत्कृष्ट हुन सफल सदस्य संस्था र संघको विकासमा उल्लेखनीय योगदान रहेका व्यक्तिहरुलाई सम्मान गरेको थियो । जस अन्तर्गत सिन्धु साकोस, सिद्धबाबा साकोस, कपिलेश्वर महिला साकोस र मिलिजुली सकोसलाई उत्कृष्ट संस्था सम्मान प्रदान गरिएको थियो भने संघको स्थापना र विकासमा उल्लेखनीय योगदान गर्नुहुने पूर्व अध्यक्षहरु नवराज पौडेल, रामप्रसाद भण्डारी र पार्वती भण्डारीलाई सम्मान गरिएको थियो । 

संघका महासचिव मिथिला घिमिरे प्याकुरेलले सञ्चालन गर्नुभएको उक्त कार्यक्रममा सञ्चालक लोकमणि तिमल्सिनाले स्वागत गर्नुभएको थियो ।