काठमाडौं । सहकारीको सन्दर्भ ब्याजदर बजार पुनरावलोकनका सम्बन्धमा बजारको अवस्था बिश्लेषण पछि मात्र निर्णय गरिने भएको छ । सहकारीको सन्दर्भ ब्याजदर निर्धारण समितिको आज सहकारी विभागमा बसेको बैठकमा वित्तीय बजारको अवस्था अनुरुप हाल कायम सन्दर्भ ब्याज दर पुनर्विचार गर्ने विषयमा छलफल भएको छ । ब्याजदर निर्धारण समितका सदस्य एव् नेफ्स्कून अध्यक्ष परितोष पौड्यालका अनुसार बजार बिश्लेषण गरेर मात्र हालको सन्दर्भ ब्याजदरमा पुनर्विचार गरिने छ ।

सहकारीमा हाल कायम १४.७५ प्रतिशत सन्दर्भ ब्याजदर पुनरावलोकनको मागको बीच त्यसका विषयमा पुनरावलोकन गर्न आज विभागमा समितिको बैठक बसेको थियो । यसअघि, आज बिहान ललितपुरमा एक कार्यक्रममा सहकारी विभागका रजिष्ट्रार झलकराम अधिकारीले पनि सहकारीका सदस्यहरुको भावना प्रतिबिम्बित हुने गरी सन्दर्भ ब्याजदर निर्धारण गरिने बताउनुभएको थियो । समितिको अर्को बैठक छिट्टै बस्ने सहमति भएको छ ।

बैंक तथा वित्तीय संस्थामा ब्याजदरको तरलता चाप बढेकाले सहकारीमा पनि ब्याजदर निर्धारण गर्न कठिनाइ भएको हो । सहकारी विभागका उपरजिष्ट्रारको संयोजकत्वमा गठन भएको प्राविधिक समितिले ब्याजदर अध्ययन गरेको थियो । बैठकमा उक्त प्रतिवेदनका विषयमा छलफल भएपनि बजार बिश्लेषण पछि मात्र पुनर्विचार गरिने सहमति भएको छ ।