ललितपुर । लतिपुरको बगलामुखीस्थित कुम्भेश्वर महिला बचत तथा ऋण सहकारी संस्था लि.को कुल कारोबार १७ करोड रहेको छ । २०६७ सालमा स्थापना भएको महिलाहरुद्वारा सञ्चालित कुभेश्वर महिला साकोसमा कुल ६ सय ७० महिला सदस्यहरु छन् । साकोसको शुक्रबार सम्पन्न ११औं बार्षिक साधारण सभामा ५ सय ५० सदस्यहरुको उपस्थिति रहेको छ ।

शुक्रबार सम्पन साधारणसभाको उद्घाटन नेफ्स्कूनका अध्यक्ष परितोष पौड्यालले गर्नुभएको थियो ।  अध्यक्ष पौड्यालले सहकारीका मुल्य, मान्यता र आदर्शलाई पच्छ्याउँदै समुदाय र सदस्य केन्द्रीत भएर सञ्चालनमा रहेका बचत तथा ऋण सहकारी संस्थाले सदैब सदस्य  हितमा काम गर्नेहुँदा सहकारीका सदस्यहरुले ढुक्क भएर सहकारीमा कारोबार गर्न सकिने बताउनुभयो । उहाँले सहकारीले गर्ने कामले सदस्यको मुहारमा खुसी छाउनुपर्ने र सदस्यको जीवनस्तरमा सुधार हुनुपर्नेमा जोड दिनुभयो । 

कुल ८५ लाख सेयर पुँजी रहेको उक्त संस्थाको १२ करोड बचत र  १३ करोड ऋण लगानी रहेको छ । सदस्यता र कारोबारमा बृद्धि सहित संस्थाले यस आ.व.मा लघुवित्त योजनामार्फत स्वरोजगार अभिबृद्धि गर्ने लक्ष्य अगाडि सारेको संस्थाका व्यवस्थापक शान्तालक्ष्मी खड्गीले जानकारी गराउनुभयो । सामुदायिक भवनबाट सदस्य सेवा प्रवाह गरिरहेको कुम्भेश्वर साकोसले यसै बर्ष भवन निर्माणको योजना समेत अगाडि सारेको छ । संस्थामा अध्यक्ष विन्जु खड्कीको अध्यक्षतामा ७ सयस्यीय सञ्चालक समिति र ३ सदस्यीय लेखा सुपरिवेक्षण समिति रहेको छ ।