काठमाडौं । बागमती प्रदेश सहकारी रजिष्ट्रारमा प्रकाश चापागाईं नियुक्त हुनुभएको छ । कार्तिक १० गतेको  सचिवस्तरीय निर्णयबाट नियुक्त चापागाईंले विहिबारदेखि निमित्त रजिष्ट्रारको जिम्मेवारी सम्हाल्नुभएको हो  । यसअघि रजिष्ट्रारको जिम्मेवारीमा रहनुभएका विक्रम पाण्डे भने रोल्पा जिल्ला सरुवा हुनुभएको छ । 

नवनियुक्त निमित्त रजिष्ट्रार चापागाईंले सहकारी क्षेत्रको गुणात्मक सुधारका लागि आफु आक्रामक रुपमा लाग्ने बचतबद्धता व्यक्त गर्नुभएको छ ।  २०६८ सालबाट सरकारी सेवामा प्रवेश गर्नुभएका रजिष्ट्रार चापागाईको सहकारी क्षेत्रसँगको सम्बन्ध विगत ५ बर्षदेखि रहँदै आएको छ  । 

२०७३/०७४ मा डिभिजन सहकारी कार्यालय धादिङमा सहकारी निरीक्षक भई नियामक निकायको साझेदारीमा काम गर्नुभएका चापागाईंले २०७६ देखि सहकारीको उजुरी छानविन तथा कारवाही कानुन अधिकृतको रुपमा रहेर काम गर्दै आएनुभएको थियो । 

भरतपुर - ७ चितवनमा स्थायी बसोबासरत चापागाईंको जन्म २०४६ साल वैशाख २१ गते भएको हो । एलएलबी र भौतिक विज्ञानमा स्नातक गर्नुभएका उहाँले राजनीतिशास्त्र र जनप्रशासनमा स्नातकोत्तर अध्ययन पुरा गर्नुभएको छ । सहकारी क्षेत्रलाई नजिकबाट नियाल्नुभएका चापागाईंले अध्ययन र अनुभवको संगमसँगै बागमती प्रदेश सहकारीको नियामकीय जिम्मेवारी बखुबीपूर्ण निभाउने र सहकारी मैत्रि कानुन निर्माणमा प्रतिबद्ध रहने बचनबद्धता व्यक्त गर्नुभएको छ ।  

साकोस आवाज सँगको कुराकानीका क्रममा उहाँले भन्नुभयो, “विशेष गरी सहकारी सुशासनमा देखिएको विचलनमा सुधार ल्याउन, नियम कानुन वेगर सञ्चालनमा रहेका सहकारीमा सुधार तथा खारेजी सँगै एकीकरण गरी दीगो सहकारी निर्माणमार्फत रोजगारी सृजना गर्ने अभियानमा तीब्रतर लाग्नेछु ।”  

उपत्यकाभित्र सहकारीहरुमा समस्या बढ्दो देखिएको छ, काठमाडौंमा मात्रै दैनिक सयौंको संख्यामा सहकारीका उजुरी परेको पाएको छु,  यसलाई कसरी व्यवस्थापन गर्ने भन्ने विषयमा सरोकारवाला निकाय सँगै अभियानसँगको सहकार्यमा काम गर्नेछु । उहाँले भन्नुभयो, “सहकारी क्षेत्र वृहत छ, आर्थिक समृद्धि र जनताको जीवनस्तर सुधारको क्षेत्रमा सहकारीमार्फत महत्वपूर्ण योगदान  पुगेको पनि छ, यसमा गुणात्मक सुधार ल्याउने पक्षमा तन मन दिएर लाग्नेछु ।” 

सहकारी सँगको साइनो निरन्तर प्रगाढ बन्दै जाओस्, साकोस आवाजको तर्फबाट हार्दिक बधाई एवम् कार्यकाल सफलताको शुभकामना ।