काठमाडौं । प्रदेश नं २ को धनुषा जिल्लाका करिब १५ सहकारीकर्मीहरुको टोलीले आज नेफ्स्कूनको अवलोकन भ्रमण गरेको छ । आदर्श स्वावलम्बन साकोस र करुणा स्वावलम्बन साकोसका सञ्चालक समितिका पदाधिकारीहरु र व्यवस्थापन प्रमुखले नेफ्स्कून केन्द्रीय कार्यालय नयाँ बानेश्वर भ्रमण गरी सहकारी तथा बचत तथा ऋण सहकारी सञ्चालनका साथै नेफ्स्कूनका गतिविधिका बारे जानकारी लिनुभएको हो ।

भ्रमण टोलीले सहकारीमा नीति, विधिको महत्व, सुशासन, सदस्य, वित्तीय तथा गैरवित्तीय कारोबार, नेफ्स्कूनले सदस्य संस्थालाई प्रदान गर्ने सहयोग आदिका बारेमा जानकारी लिएको हो । टोलीलाई नेफ्स्कूनका प्रशासन तथा समन्वय विभाग प्रमुख सञ्जयराज तिमल्सिनाले सहकारीको मर्म, सुशासन, धनुषाको स्थानीय मिथिला कला संस्कृति प्रवधर्नमा सहकारी भूमिकाको सम्भावना, सदस्य र पुँजीको विस्तार, वित्तीय साक्षरता, ऋण लगानी र सदुपयोगिता, बचतको महत्व, सहकारी शिक्षा आदिका सम्बन्धमा साकोसहरुले खेल्नुपर्ने र खेल्नसक्ने भूमिकाका बारेमा अवगत गराउनुभएको थियो । उहाँले दुवै साकोसहरुमा उल्लेख्य महिला सदस्य रहेको भन्दै प्रदेश नं २ मा कार्यरत साकोसहरुले महिला शसक्तिकरणमा भूमिका खेलेकोको प्रशंसा गर्नुभयो ।

आदर्श स्वावलम्बन साकोसका अध्यक्ष नारायण विक्रम यादव सहभागी कार्यक्रममा संस्थाका व्यवस्थापक लालबाबु यादवले भ्रमणको अपेक्षा र संस्थाको गतिविधिहरुबारे जानकारी गराउनुभएको थियो ।संक्षिप्त कार्यक्रममा नेफ्स्कूनका व्यवसाय विभाग प्रमुख राधेश्याम श्रेष्ठ, अन्तरलगानी अधिकृत मनोज बुढाथोकी र तालिम अधिकृत सुमनराज घिमिरे पनि सहभागी हुनुहुन्थ्यो । यसअघि टोलीले पोखराको आस्था साकोसको पनि अवलोकन भ्रमण गरेको थियो ।

२०६२ सालमा स्थापित आदर्श स्वावलम्बन साकोसका ६ सय सदस्यमा ६० पुरुष छन् भने करुणा साकोसका ४ सय ५० सदस्यमा २२ पुरुष र बाँकी महिला छन् । करुणा साकोसको कुल सम्पत्ति हाल ५ करोड र आर्दश स्वावलम्बनको साढे ६ करोड रहेको जानकारी कार्यक्रममा गराइएको थियो ।