– विकाश पराजुली

छिटो, छरितो, सरल र सहज तरिकाले काम हुन थालेपछि रूपन्देहीका सहकारीहरूले पनि प्रविधिको प्रयोग बढाएका छन् । प्रविधिको प्रयोगले सेवाग्राही र सेवाप्रदायक दुवैलाई सहज बनाएको प्रयोगकर्ताहरू बताउँछन् । प्रविधिकै प्रयोगले सहकारीको कार्यालयमा लाइन लागेर सेवा लिनुपर्ने झञ्झट पनि हटेको उनीहरूको भनाइ छ ।

ईश्वरी मरासिनी

रूपन्देहीको तिलोत्तमास्थित शंकरनगरमा रहेको सामूहिक बचत तथा ऋण सहकारी संस्थाले एटीएम सेवा सुरु गरेको दुई वर्षभन्दा बढी भयो ।

सुरुवातमा धेरैले चासो नदिए पनि यो सेवामा अहिले आर्कषण बढेको सहकारीले जानकारी दिएको छ ।

लुम्बिनी प्रदेशमै एटीएम सुरु गर्ने यो पहिलो सहकारी हो । त्यसबाहेक फोन पे मोबाइल एप, एसएमएस सेवा पनि सहकारीले दिइरहेको छ । यसले सेवाग्राहीलाई सहज भएको बताउँछन् सहकारीका वरिष्ठ व्यवस्थापक ईश्वरी मरासिनी ।

कारोबारका हिसाबले लुम्बिनी प्रदेशकै ठूलो यो सहकारीको कुल निक्षेप २ अर्ब १४ करोड ८३ लाख छ । गत वर्ष ६ करोड ८५ लाख नाफा कमाएको यो सहकारीको सेयर पुँजी २७ करोड ४० लाख छ ।

वचत तथा ऋण कारोबारमा केन्द्रित सहकारीहरू पछिल्लो समय प्रविधिमैत्री बनिरहेका छन् । रूपन्देहीका बचत तथा ऋण सहकारी एवं बहुउद्देश्य सहकारी मात्र नभइ साना पशुपालक कृषि सहकारीहरू पनि प्रविधिमैत्री बन्दै जान थालेका छन् । प्रविधिको प्रयोग बढेसँगै सेवाग्राहीहरूलाई सहज भएको सहकारीहरूले जनाएका छन् ।

विनोद प्रताप राणा

कोभिडको महामारीमा यस्ता सेवाले सदस्यलाई प्रत्यक्ष फाइदा पुगेको सहकारीका सञ्चालकहरू बताउँछन् । ‘सहकारीकै माध्यमबाट मोबाइल एप, एसएमएस बैंकिङ हुने भएकाले कोभिडमा समेत सदस्यहरूले धेरै सुविधा पाए,’ लुम्बिनी सहकारीका व्यवस्थापक विनोद प्रताप राणाले भने, ‘यसमा सदस्यहरूको आर्कषण अझै बढाउँदै लैजाने र भावी दिनमा डिजिटल पेमेन्टलाई आत्मसाथ गर्ने गरी अघि बढेका छौँ ।’

कुल २ हजार ७ सय ९ सदस्य रहेको सहकारीका १ हजारभन्दा बढी सदस्यले मोबाइल एप प्रयोग गर्दै आएको उनले बताए । १ अर्ब ४ करोड ५५ लाख बचत रहेको यस सहकारीले गत वर्ष ४ करोड ८० लाख रुपैयाँ नाफा गरेको थियो ।

तिलोत्तमामा रहेको जनउत्थान सहकारीले पनि सेयर सदस्यलाई मोबाइल बैंकिङ, फोन पे लगाएतका सेवा दिइरहेको छ । सहकारीकी अध्यक्ष ज्ञानु पौडेलले अहिले सहकारीका २ हजार २ सयभन्दा बढीले मोबाइल एप मार्फत सेवा पाइरहेको जानकारी दिइन् ।

शिलापत्र डट कम बाट साभार गरिएको ।