बन्दीपुर । जन आकांक्षा महिला साकोस धादिङको संस्थागत विकास तालिम तनहुँको बन्दीपुरमा सुरु भएको छ । वैशाख २ गते देखि ५ गतेसम्म चल्ने तालिममा संस्थाको संचालक समिति, उपसमिति र कर्मचारी गरी २१ जनाको सहभागिता रहेको छ । उद्घाटन समारोहमा प्रमुख अतिथि जिल्ला बचत संघ धादिङका अध्यक्ष टाप बहादुर श्रेष्ठले वित्तिय सहकारी जोखिमयुक्त भएकोले साकोसलाई शुसासन र व्यवस्थित संचालन गर्न जिम्मेवार सञ्चालक समिति र कर्मचारीहरुको निरन्तर क्षमता अभिवृद्धि आवश्यक रहेको भन्दै यो तालिम निकै महत्वपूर्ण भएको दाबी गर्नुभयो । उहाँले तालिम पश्चात संस्था संचालनमा सकारात्मक सुधारका लागि कार्यान्वयनमा जान आग्रह गर्दै सदस्य सेवामा ध्यान दिदैं गुणस्तरीय सेवा प्रवाहमा जोड दिन आग्रह गर्नुभयो । प्रमुख अतिथि श्रेष्ठले संस्था नीति विधि र प्रविधिबाट संचालन गर्नुपर्ने कुरामा जोड दिनुभयो । उद्घाटन समारोह संस्थाकी अध्यक्ष सिता दुवाडी खनालको अध्यक्षतामा सञ्चालन भएको थियो । तालिम सहजीकरण नेफ्स्कूनका वरिष्ठ अधिकृत भरत प्रसाद न्यौपाने र कार्यक्रम अधिकृत कोमल राज अधिकारीले गर्नुभएको छ ।