कास्की । पोखरा ८, न्यूरोडस्थित पिपल्स बचत तथा ऋण सहकारी संस्था लि.का सञ्चालक तथा कर्मचारीहरुको क्षमता अभिवृद्धि तालिम सम्पन्न भएको छ । चैत २७ र २८ गते सञ्चालित तालिमको दोस्रो तथा अन्तिम दिन सञ्चालकहरुको क्षमता विकाससम्बन्धी अभिमुखी सञ्चालन गरिएको थियो । कार्यक्रममा सहकारी र साकोस सञ्चालन पद्धति, सञ्चालकहरुको भूमिका, कर्तव्य, अधिकार, प्रभावकारिता, नेतृत्व विकासको महत्व तथा आयामहरु आदि विषयमा नेफ्स्कूनका सञ्चार अधिकृत रञ्जनमणि पौड्यालले सहजीकरण गर्नुभएको थियो ।

यसैगरी, अघिल्लो दिन सुशासनका विषयमा संस्थाका निवर्तमान अध्यक्ष युवराज बोहरा, कर्मचारीहरुको क्षमता विकाससम्बन्धमा संस्थाका सचिव देवेन्द्र बास्तोलाले, तनाव व्यवस्थापन तथा कर्मचारी उत्प्रेरणासम्बन्धमा संस्थाका सञ्चालक विश्वास पराजुली र संस्था सञ्चालनका विविध पक्षमा संगिता पौडेलले सहजीकरण गर्नुभएको थियो ।

संस्थाका अध्यक्ष शंकर बहादुर खत्रीले तालिमले संस्थाका सञ्चालकहरुलाई सहकारी सञ्चालनका आधारभूत विषयमा जानकारी प्राप्त गर्ने अवसर प्रदान गरेको बताउनुभयो । यसैगरी, कर्मचारीहरुले पनि विभिन्न उपयोगी विषयमा उत्प्रेरणामूलक शिक्षा लिने अवसर तालिमबाट प्राप्त गरेको उहाँले उल्लेख गर्नुभयो । अध्यक्ष खत्रीले यस्ता खालका तालिमलाई अब निरन्तरता दिइने बताउँदै सक्रिय सञ्चालकका साथै दक्ष र अनुभवी व्यवस्थापनको सहकार्यका आधारमा पिपल्स साकोसलाई थप उचाईमा पुर्याउने प्रतिबद्धता समेत व्यक्त गर्नुभयो ।

तालिमका सहभागी संस्थाका अन्य सञ्चालक एवम् कर्मचारीहरुले पनि यस प्रकारका तालिमले सहकारी र त्यसमा पनि बचत तथा ऋण सहकारी सञ्चालन, सुशासन, वित्तीय स्वास्थ्य, सदस्यको भूमिका, सञ्चालकको जिम्मेवारी, कर्मचारी र सञ्चालकहरुबीचको सम्बन्ध आदिका बारेमा जान्ने बुझ्ने अवसर प्राप्त भएको भन्दै प्रसन्नता व्यक्त गर्नुभएको थियो ।