सौराहा, चितवन । कास्की जिल्लास्थित पोखरा रोयल बचत तथा ऋण सहकारी संस्था लि.को आयोजना तथा नेफस्कूनको प्राविधिक सहयोगमा चितवनको सौराहामा सञ्चालकहरुको क्षमता अभिवृद्धि तालिम (CUDCC) प्रारम्भ भएको छ । संस्थाका सञ्चालक, लेखा सुपसिवेक्षण समिति, विभिन्न उपसमितिहरु र उच्च व्यवस्थापनका गरी २४ जना सहभागी उक्त तालिम हिजो अर्थात् चैत्र १ गतेदेखि सुरु भई चैत ५ गतेसम्म सञ्चालन हुनेछ । हिजो आयोजित संक्षिप्त कार्यक्रमबीच नेफस्कूनकी उपाध्यक्ष शान्ति अधिकारीले तालिमको औपचारिक उद्घाटन गर्नुभयो ।

उद्घाटन क्रममा प्रमुख अतिथि अधिकारीले बचत तथा ऋण सहकारी संस्था सञ्चालनको लागि सञ्चालकहरुमा दिगो सोच र प्रबल ईच्छाशक्ति आवश्यक हुने धारणा राख्नुभयो । उहाँले ईतिहासमा अल्मलिनुभन्दा भविष्य कस्तो बनाउने भन्नेतर्फ योजना बनाउनु पर्ने र बचत तथा ऋण सहकारीहरु केवल वित्तीय गतिविधिमा मात्र सिमित नरही सदस्यहरुको सामाजिक तथा व्यावसायिक हितका लागि संस्थागत रुपमा ठूला परियोजनाहरु सञ्चालनका लागि पनि तयार रहनुपर्ने सुझाब राख्नुभयो ।
 
संस्थाका अध्यक्ष मेजर तुलसीप्रसाद गुरुङको अध्यक्षता, उपाध्यक्ष रुद्रकुमारी गुरुङको स्वागत मन्तव्य र संस्थाका प्रमुख कार्यकारी अधिकृत भीम गुरुङको सञ्चालन रहेको कार्यक्रममा नेफ्स्कूनका निवर्तमान प्रमुख कार्यकारी अधिकृत शिवजी सापकोटा, विकू साकोसका प्रमुख कार्यकारी अधिकृत माधव पौडेल, चन्द्रागिरी साकोसका प्रमुख कार्यकारी अधिकृत कृष्णकुमार श्रेष्ठ र नेफ्स्कूनका वरिष्ठ तालिम अधिकृत बल्लभ तिमिल्सिनाले सहजीकरण गर्ने कार्यक्रम रहेको छ ।

गण्डकी प्रदेशको पोखरामा प्रधान कार्यालय रहेको संस्था हाल नेपाल बचत तथा ऋण केन्द्रिय सहकारी संघ लि.द्धारा सञ्चालित पूर्ण तथा व्यावसायिक साकोस विकास कार्यक्रम (प्रोबेसन) गण्डकी क्लष्टर अन्तर्गत आवद्ध रहेको छ । संस्थाले ७ हजार सदस्य मार्फत २ अर्ब बराबरको वित्तीय कारोबार गरिरहेकोे संस्थाको सूचना अधिकारी मिलन ढकालले जानकारी गराउनुभयो ।