नारायणगढ। नजिकिदै गरेको १ सय ११ औं अन्तर्राष्ट्रिय नारी दिवसको अवसरमा नेपाल बचत तथा ऋण केन्द्रीय सहकारी संस्था लिमिटेड (नेफ्स्कून) चितवन फिल्ड कार्यालयको आयोजनामा सहकारीमा सूचना तथा सन्देश प्रवाह कार्यशला गोष्ठी आज सम्पन्न भएको छ । चितवन र नवलपरासी जिल्लाका महिला बचत तथा ऋण सहकारी संस्थाका व्यवस्थापक तथा सूचना अधिकारीको सहभागितामा कार्यशाला गोष्ठी गरिएको हो । ४० जना सहकारीकर्मी महिला सहभागी रहेका कार्यक्रमको सहजीकरण पत्रकार प्रतिमा सिलवालले गर्नुभएको थियो । 

गोष्ठीमा सहकारीले आफ्ना सूचना तथा सफलताका कथाहरु कसरी सञ्चारमाध्यमसम्म पुर्याउन सक्छन् र पत्रकारसँगको सम्बन्ध कसरी बढाउने भन्ने सम्बन्धमा छलफल भएको नेफ्स्कूनकी सञ्चालक विद्या कोइरालाले जानकारी दिनुभयो । कार्यक्रमको उद्घाटन कार्यक्रममा नेफ्स्कूनकी उपाध्यक्ष शान्ती अधिकारीले महिलाले सञ्चालन गरेका सहकारी संस्थाहरुले उदाहरणीय कामहरु गरेका भएपनि उनीहरुले आफ्नो कार्यक्रमको प्रचार प्रसार गर्न नसकेको बताउनु भयो ।