काठमाडौं । चन्द्रागिरी नगरपालिकाको प्रायोजन, चम्किला तारा महिला साकोसको व्यवस्थापन र शान्ति महिला कृषि समूहको आयोजनामा सात दिने साबुन उद्योग व्यवस्थापन र उद्यम विकास तालिम कार्यक्रमको आज छैटौं दिन सहभागीहरुका लागि साबुन बनाउने तालिम प्रदान गरिएको छ ।  प्रशिक्षक सञ्जित आलेमगर र चम्किला तारा महिला साकोसकी कोषाध्यक्ष सीतादेवी सिग्देलले आज उद्यम विकास तालिमका १५ सहभागीहरुलाई झोल साबुन बनाउने तालिम दिनुभयो । माघ १४ गते चन्द्रागिरी नगरपालिका १२, हरियालीस्थित सञ्चालित तालिमको उद्घाटन नगरपालिकाका मेयर घनश्याम गिरीले गर्नुभएको थियो । उहाँले महिलाहरुलाई उद्यमशीलता विकासमा जोड्दै आर्थिक शसक्तिकरणमा उल्लेखनीय योगदान गर्न स्थानीय तहले सक्दो सहयोग गर्ने प्रतिवद्धता व्यक्त गर्नुभएको थियो । तालिम उद्घाटन सत्रमा विशेष अतिथिमा सोही नगरपालिकाकी उपमेयर लिशा नकर्मी हुनुहुन्थ्यो ।

सात दिने उक्त तालिममा महिलाहरुलाई उद्यम विकास, आम्दानीका स्रोत पहिचान, सफल उद्यमीका गुणहरु, व्यवसाय विकासका सम्भावना, झोल सावुन निर्माण लगायत विविध विषयमा तालिमहरु प्रदान गरिएको छ । सात दिने उक्त तालिमको अध्यक्षता शान्ति महिला कृषि समूहकी संयोजक सविना सञ्जेलले गर्नुभएको छ । अध्यक्ष तारा रानाको नेतृत्वमा सञ्चालित चम्किला तारा महिला साकोस महिला सञ्चालकहरुद्वारा सञ्चालित साकोस हो भने सेयर सदस्यहरुमा महिला पुरुष दुवैको सहभागिता छ । तालिम भोलि समापन हुँदैछ ।