बुटवल । नेफ्स्कून र लुम्बिनी प्रदेश अन्तर्गत ३ जिल्लाका बचत तथा ऋण सहकारी संस्थाका व्यवस्थापन प्रमुखहरुबीच सहकारी तथा साकोस अभियानका सामयिक विषयहरुमा अन्तरक्रिया भएको छ । बुटवल–८ मा सम्पन्न कार्यक्रममा नेफ्स्कूनका महासचिव, कोषाध्यक्षसँगै उच्च व्यवस्थापन समूहले रुपन्देही, नवपलपरासी र कपिलवस्तु जिल्लाका  ४० बचत तथा ऋण सहकारी संस्थाका व्यवस्थापन प्रमुखहरुसँग सहकारी र साकोस अभियानका समसामयिक विषयहरुका बारेमा छलफल गरेको हो ।

कार्यक्रममा नेफ्स्कूनका महासचिव दामोदर अधिकारी, कोषाध्यक्ष दिपक पनेरु, कामु प्रमुख कार्यकारी अधिकृत प्रकाश प्रसाद पोखरेल, प्रशासन तथा समन्वय विभाग प्रमुख सञ्जयराज तिमल्सिना, व्यवसाय विभाग प्रमुख राधेश्याम श्रेष्ठ, रुपन्देही फिल्ड कार्यालय इन्चार्ज राधा पोखरेल, सूचना प्रविधि अधिकृत प्रविण अधिकारी लगायतको उपस्थिति थियो भने नेफ्स्कून साकोस म्यानेजर्स क्लबका निवर्तमान संयोजक एवम् कोलिय देवदह साकोसका व्यवस्थापक विनोद पराजुली, जनउत्थान साकोसका व्यवस्थापक रणबहादुर थापा लगायतको उपस्थिति थियो । कार्यक्रममा नेफ्स्कूनको सेवा व्यवसाय, तालिम र शिक्षा, पहुँच विस्तार, संस्थाहरुको आन्तरिक मुल्याङकन आदि विषयका साथै दोहोरो सदस्यता, प्रविधि, विशिष्टीकृत सहकारी संघ लगायतका समग्र सहकारी अभियानका विषयमा सहभागीहरुको जिज्ञासाको सम्बोधन समेत गरिएको थियो ।