सिन्धुपाल्चोक । सिन्धुपाल्चोक जिल्लाको बाह्बिसेस्थित शुभप्रभात बचत तथा ऋण सहकारी संस्था लि.को आयोजनामा २ दिने रणनीतिक व्यावसायिक योजना निर्माण कार्यशाला गोष्ठी आज शुरु भएको छ । संस्थाका अध्यक्ष विकाशकाजी श्रेष्ठको अध्यक्षता र नेफ्स्कूनका सदस्य सेवा विभाग प्रमुख दुर्गाप्रसाद ढकाल तथा तालिम अधिकृत सुमनराज घिमिरेको आतिथ्यमा रणनीतिक व्यावसायिक कार्यशाला गोष्ठी कार्यक्रम आज उद्घाटन भएको हो ।

गोष्ठीमा स्वागत मन्तव्य राख्दै संस्थाका सचिव दिपक बिक्रम थापाले व्यावसायिक योजनाको महत्व माथि प्रकाश पार्नुभएको थियो ।  संस्थाका पूर्व अध्यक्ष शम्भु बहादुर तिमल्सिनाले योजना निर्माणसँगै कार्यान्वयनमा पनि जोड दिनुभएको थियो । कार्यक्रम सञ्चालन संस्थाका व्यवस्थापक सुरेन्द्र तिवारीले गर्नुभएको थियो । गोष्ठीमा २० जनाको सहभागिता रहेको छ ।

संस्थाको प्रतिस्पर्धी क्षमता, विश्वसनीयता, गुणस्तरीयता एवम् अपेक्षाकृत वृद्धिका लागि रणनीतिक व्यावसायिक योजना निर्माण गरेर अघि बढ्नुपर्ने महसूस भएसँगै अभिभावक निकाय नेफ्स्कूनको प्राविधिक सहयोगमा उक्त कार्य थालनीका लागि गोष्ठी आयोजना गरिएको संस्थाका अध्यक्ष श्रेष्ठले बताउनुभयो । कार्यक्रममा नेफ्स्कून सदस्य सेवा विभाग प्रमुख ढकाल एवम् तालिम अधिकृत घिमिरेले रणनीतिक योजनाको महत्व, आयामसँगै यसका विविध पक्षका बारेमा सहभागीहरुलाई सहजिकरण गर्नुभएको थियो ।