भक्तपुर । सहकारी विभागका रजिष्ट्रार डा. टोकराज पाण्डेले सहकारी ऐन २०७४ र नियमावली २०७५ बीच कतिपय बुँदाहरुमा मेल नभएकोले कार्यान्वयनमा व्यावहारिक समस्या हलका लागि संशोधन आवश्यक भएको बताउनुभएको छ । भक्तपुर जिल्ला बचत तथा ऋण सहकारी संघ लि. भक्तपुरको हिजो सम्पन्न १६ औ वार्षिक साधारणसभाका प्रमुख अतिथि रजिष्ट्रार पाण्डेले ऐन र नियमावली संशोधनको औचित्य पुष्टि पार्नुभएको हो । त्यस सम्बन्धमा मन्त्रालय र विभागबाट भैरहेको तयारीका विषयमा भने उहाँले थप केही बताउनुभएन ।

भक्तपुर जिल्लाका सहकारीहरु तुलनात्मक रुपमा  सुशासित, अनुकरणीय र समुदायमा भिजेर काम गर्न बढी नै सफल भएको भन्दै रजिष्ट्रार  पाण्डेले प्रशंसा गर्नुभएको छ । उहाँले भक्तपुरका सहकारीहरुले सदस्यको हितलाई केन्द्रविन्दूमा राखेर काम गरेको र ३३ प्रतिशत महिला सहभागिता पनि सुनिश्चित गरेको बताउनुभयो । त्यस्तै, सन्दर्भ व्याजदरको समेत स्वागत गरेर भक्तपुर जिल्ला बचत संघले कार्यान्वयनमा सहजता ल्याएको भन्दै रजिष्ट्रार पाण्डेले समुदायमा आधारित सहकारीको विकासमा भक्तपुर बचत संघले खेलेको भुमिका अनुकरणीय रहेको बताउनुभयो ।

कोभिड १९ पछि उत्पन्न परिस्थितिका कारण सहकारीमा अधिक तरलता निक्षेप बढेको,  ६५ लाख भन्दा बढी सदस्य र १ लाख भन्दा बढीलाई रोजगारी दिएको सहकारी क्षेत्रले कुल ग्राहस्थ उत्पादनमा ४ प्रतिशत भन्दा बढी योगदान दिएको तथ्याङक समेत रजिष्ट्रार  पाण्डेले सार्वजनिक गर्नुभयो । बचत तथा ऋण सहकारी अनुगमन निर्देशिकामा विषयगत संघ र ख, ग र घ बर्गको बैंक तथा वित्तीय संस्थामा रहेको संस्थाको निक्षेपलाई पनि तरलता गणना गर्ने गरी संशोधन भएको डा. टोकराज पाण्डेले जानकारी गराउनुभयो । 

कार्यक्रमका अतिथि नेफ्स्कूनका कोषाध्यक्ष दिपक पनेरुले भक्तपुर पर्यटकीय क्षेत्रमा मात्र नभई सहकारी क्षेत्रको रुपमा पनि परिचित रहेको बताउनुभयो । उहाँले भक्तपुर बचत संघले समुदायको सहकारी विकासका लागि विभिन्न तालिम तथा कार्यक्रमहरु संचालन गर्दै आएको र त्यसमा नेफ्स्कूनको साथ, समर्थन र सहयोग सदैब रहने कुरा बताउदै ब्राण्डको विषयलाई लिएर नेफ्स्कूनमा कुनै समस्या नरहेको बरु व्यक्तिको सोचमा समस्या रहेको उल्लेख गर्नुभयो । संघका निवर्तमान अध्यक्ष राधेश्याम सुवालले दोहोरो सदस्यताले ऋण लगानी तथा असुलीमा मात्र समस्या रहेकोले कर्जा सुचना केन्द्र स्थापना गरी उक्त समस्याको न्यूनीकरण गर्न सकिने धारणा राख्नुभयो । 

सभाका सभापति संघका अध्यक्ष कृष्ण गोविन्द लाखाजुले सन्दर्भ व्याजदर र सेवा शुल्क तोक्ने सहकारी विभागको कार्यले सदस्यले सदस्यलाई शोषणबाट सचेत बनाएको  बताउनुभयो । उहाँले एक व्यक्ति एक सहकारीको व्यवस्था व्यवहारिक नभएकोले संशोधन हुनुपर्ने विचार राख्दै सहकारीको आयकर ५ प्रतिशत हुँदा सहकारी संघ संस्थामा अग्रिम व्याज करकट्टी १५ प्रतिशत नै कायम रहनु न्याचित नभएको बताउनुभयो ।

संघका उपाध्यक्ष हरि बल्लले स्वागत मन्तव्य राख्दै अव्यवहारिक र समाजले स्वीकार्न  नसक्ने सामाजिक सुधार ऐन जारी भएपनि लागु नभए जस्तै सहकारी ऐन नियममा भएका अव्यवहारिक पक्ष कार्यान्वयनमा समस्या रहेकोले संशोधन गर्नुपर्ने विचार राख्नुभयो । संघका सचिव जगनाथ प्रजापतिले संघको आ.व. २०७६।७७ को बार्षिक प्रगति प्रतिवेदन प्रस्तुत गर्दै १५ प्रतिशत लाभांश प्रस्ताव र संरक्षित पुजी फिर्ता रकम प्रस्ताव पेश गर्नुभयो । संघका कोषाध्यक्ष कान्छा भक्त घजुले आ.व. २०७६।७७ को वित्तीय प्रगति प्रतिवेदन पेश गर्नु भयो । सभाबाट आ.व.२०७६।७७ मा १ अर्व २ करोड ९९ लाख ६८ हजारको वासलात र १ करोड ४४ लाख ४३ हजारको नाफा सहितको लेखापरिक्षण प्रतिवेदन पारित गरियो । साथै सभाले आगामी आ.व.२०७७।७८ का लागि १ अर्व ५४ करोड ५७ लाख ९३ हजारको बजेट पारित गरेको छ । सभाले संघको भवन निमार्णको सिलसिलामा साढे तीन तल्लाको संरचना निर्माण कार्य सम्पन्न भई अन्तिम कामहरु भइरहेकोले १ करोड बजेट र १५ लाख ६२ हजार ३ सय रुपैंयामा प्रस्तावित कार्यक्रम तथा तालिम प्रस्ताव पारित गरेको छ । संघका लेखा सुपरिवेक्षण समितिका संयोजक बालमुकुण्द उपाध्यायले आ.व.२०७६।७७ को लेखा सुपरिवेक्षण समितिको बार्षिक प्रतिबेदन पेश गर्नुभएको थियो ।

उक्त सभामा संरक्षित पुँजी फिर्ता कोष बचत र ऋणको आधारमा अधिकत्तम योगदान गर्ने बचतमा सिद्धि गणेश बचत तथा ऋण सहकारी संस्था लि., उपकार बचत तथा ऋण सहकारी संस्था लि. र श्रमिक बचत तथा ऋण सहकारी संस्था लि. र ऋणमा संचित बचत तथा ऋण सहकारी संस्था लि., बंगलामुखी बचत तथा ऋण सहकारी संघ लि. र एकता बचत तथा ऋण सहकारी संस्था लि. गरी तीन ३ वटा संस्थालाई प्रशंसा पत्र वितरण गरिएको थियो ।  संघको १६ औं बाषिक साधारण सभा महामारीमा साधारण सभा संचालन कार्यविधि अनुसार मिति २०७७ पुष ३ गते देखि प्रतिनिधिको उपस्थिति शुरु भई पुष ११ गते प्रतिनिधिहरुको भर्चुअल उपस्थिति र भौतिक रुपमा समिति, उपसमिति र कर्मचारी गरी १३३ जनाको उपस्थितिमा सम्पन्न भएको हो ।