एजेन्सी । विश्व ऋण परिषद् (ओकू) ले सन् २०२१ म हुने वार्षिक सम्मेलनमा वित्तीय सहकारीका समसामयिक मुद्दाहरुमा कार्यपत्र प्रस्तुतिका लागि विषयविज्ञहरुबाट प्रस्ताव माग गरेको छ । कोभिड १९ का कारण अर्को अंग्रेजी वर्ष (सन् २०२१) को जुलाई १४ देखि २१ सम्म आयोजना हुने सम्मेलन यो पटक भर्चुअल रुपमा आयोजना गरिने ओकूले जनाएको छ । सोही सम्मेलनका लागि वित्तीय सहकारीहरुको जल्दाबल्दा विषयहरुका कार्यपत्र प्रस्तुतिका लागि ओकूले विषय विज्ञहरुबाट प्रस्ताव आब्हान गरेको हो ।

उक्त सम्मेलनमा विभिन्न ३० वटा शैक्षिक सत्रहरु आयोजना गरिने कार्यक्रम छ । ओकूले वित्तीय सेवाको भविष्य, प्रविधिमा परिवर्तन, फिनटेक, बजारीकरण तथा स्तरीकरण, सदस्य सेवा, साइबर सुरक्षा र विविधता, समता तथा समावेशिताको मुल शीर्षकहरुमा आधारित रहेर आफुले गर्ने प्रस्तुतिका सम्बन्धमा आगामी मार्च १९ सम्म प्रस्ताव पेश गर्न ओकूले आग्रह गरेको छ । ओकूले माथिका मुल शीर्षकहरुबाहेक वित्तीय सहकारीका अन्य समसामयिक विषयमा पनि कार्यपत्र प्रस्तुत गर्न सकिने जनाएको छ । यो अवसरका कारण विश्वभरिका सहकारी विज्ञहरुबाट नवीन विचार र सम्भावाहरुको खोजी हुने अपेक्षा ओकूले गरेको छ । यसले वित्तीय सहकारीको भविष्य निर्धारणमा अहम भूमिका खेल्ने ओकूको दाबी छ ।