सुनसरी । पूर्वी जिल्लाहरुको भ्रमणमा रहनुभएका नेफ्स्कूनका कोषाध्यक्ष दिपक पनेरु एवम् सुनसरीमै रहनुभएकी नेफ्स्कूनकी सञ्चालक गोमा नेपाल सहितको टोलीले आज सुनसरी जिल्ला बचत संघका पदाधिकारीहरुसँग पनि छलफल गरेको छ ।  अपरान्ह जिल्ला बचत संघको कार्यालयमा भएको छलफलमा सुनसरी जिल्ला बचत संघकी बरिष्ठ उपाध्यक्ष योगमाया सुवेदी सहित पदाधिकारी र सञ्चालकहरुको टोलीले नेफ्स्कून टोलीलाई स्वागत गरेको थियो । कार्यक्रममा व्यवसाय अधिकृत मनोज बुढाथोकी, कार्यक्रम अधिकृत सन्दिपराज ढकाल, अनुगमन अधिकृत मुकेश दाहाल लगायतको उपस्थिति थियो । अन्तरक्रियामा नेफ्स्कून जिल्ला बचत संघ साझेदारीलाई केन्द्रमा राखेर अन्य समसामयिक विषयमा छलफल भएको थियो ।  नेफ्स्कूनको विकास र वृद्धिमा जिल्ला संघहरुको भूमिका महत्वपूर्ण रहेको भन्दै कोषाध्यक्ष पनेरुले नेफ्स्कूनले सधै जिल्ला संघसँगको सम्बन्ध र भूमिकालाई महत्व दिएको बताउनुभयो ।

उहाँले नेफ्स्कून र जिल्ला संघ साझेदारीको कार्यक्रमलाई थप प्रभावकारी रुपमा अघि बढाउने विषयमा  आफ्नो भ्रमण केन्द्रित रहेको समेत जानकारी गराउनुभयो । आजको छलफलबाट महत्वपूर्ण राय सुझावहरु प्राप्त भएको दाबी कोषाध्यक्ष पनेरुको थियो । साथै सहकारी तथा साकोस अभियानका विविध विषयमा पनि सुनसरी जिल्ला बचत संघसँग छलफल भएको नेफ्स्कूनका व्यवसाय अधिकृत मनोज बुढाथोकीले बताउनुभयो ।

छलफलका क्रममा जिल्ला संघ साझेदारी कार्यक्रमलाई थप शसक्त बनाउने अभियानमा सुनसरी जिल्ला बचत संघको साथ र सहयोगको अपेक्षा गरेको कोषाध्यक्ष पनेरुले बताउनुभयो । जवाफमा सुनसरी जिल्ला बचत संघकी बरिष्ठ उपाध्यक्ष सुवेदीले नेफ्स्कूनसँग सहकार्यका लागि संघ सदा तयार रहेको धारणा राख्नुभएको थियो । संघका कोषाध्यक्ष पनेरु र व्यवसाय अधिकृत बुढाथोकीको टोली “नेफ्स्कून सेवा तथा व्यवास अभिमुखीकरण” को सिलसिलामा केही दिन देखि पूर्वी जिल्लाको भ्रमणमा रहेको छ । उहाँहरुले भोली धरानमा पनि महत्वपूर्ण भेटघाट र छफल गर्ने कार्यक्रम रहेको छ ।