काठमाडौं । बागमती प्रदेश सहकारी संघका नवनिर्वाचित अध्यक्ष रामशरण शर्मा घिमिरेले नयाँ संघीय संरचना अनुरुप गठित संघ सरोकारवाला निकायहरुको साथ र सहयोगमा अघि बढ्ने बताउनुभएको छ । मुलुकको सन्दर्भमा प्रादेशिक सहकारी संघहरुको अवधारणा नौलो अनुभव भएको बताउँदै उहाँले प्रदेश र स्थानीय तहसँगै राष्ट्रिय सहकारी महासंघ, नेफ्स्कून, राष्ट्रिय सहकारी बैंक, जिल्ला विषयगत संघदेखि प्रारम्भिक संस्थाहरु सबैको सहयोग अपरिहार्य भएको धारणा राख्नुभयो ।

गत वर्ष असोज १ मा तदर्थ समिति बनाएको संघले गत साउन १४ गते विधिवत दर्ता प्रमाण पत्र प्राप्त गर्नुका साथै कार्तिक २२ र २३ गते ललितपुरमा प्रारम्भिक साधारण सभा सम्पन्न गरेको थियो ।  सभाले घिमिरेको नेतृत्वमा १५ सदस्यीय सञ्चालक समिति र नेत्रराज पौडेलको संयोजकत्वमा ३ सदस्यीय लेखा सुपरिवेक्षण समिति सर्वसम्मत् चयन गरेको हो । सभामा ५४ वटा जिल्ला विषयगत संघका प्रतिनधिहरुको सहभागिता थियो । बागमती प्रदेश सहकारी ऐन र नियमावली जारी भएसँगै औपचारिक रुपमा दर्ता भएको संघको तदर्थ समितिका अध्यक्ष समेत घिमिरे रहुनभएको थियो । तदर्थ समितिमा रहनुभएकाहरुमध्ये नयाँ सञ्चालक समितिमा २ पदमा नयाँ अनुहारले प्रवेश पाएको छ । 

सहकारीका जल्दाबल्दा मुद्दाहरुमा बहसपैरवी गर्ने प्रमुख योजना बोकेको संघले प्रदेशको हकमा नेतृत्व लिने जनाएको छ । यसका लागि केन्द्रीय र जिल्ला विषयगत संघहरुसँग नियमित अन्तरक्रिया गर्ने र सहकार्यका माध्यमबाट अघि बढ्ने कार्यक्रम अघि सारेको छ । हाललाई अन्तरलगानीको योजना नरहेको संघले अभियानका अन्य निकायहरुले गरेका राम्रा कुराहरुमा साथ समर्थन र निरन्तरता दिने स्पष्ट पारेको छ । यी लगायतका काम गर्न सक्षम सञ्चालक समिति निर्वाचित भएको अध्यक्ष घिमिरेको दाबी छ । 

नव निर्वाचित समितिमा प्रदेश अन्तर्गत १३ जिल्लामध्ये सिन्धुली, रामेछाप र रसुवाबाहेक सबै जिल्लाबाट प्रतिनिधित्व भएको अध्यक्ष घिमिरेले बताउनुभयो । । समितिमा जिल्ला संघको वहालवाला र पूर्व अध्यक्ष तथा सञ्चालकहरु सहित युवा जोश तथा पाको अनुभवको उचित सम्मिश्रण भएको उहाँले उल्लेख गर्नुभयो । संघको कार्यालय हाललाई ललितपुर जिल्ला संघमा रहने छ भने यो वर्ष कुनै कर्मचारी नियुक्त नगरी समितिले नै काम गर्ने मितव्ययी योजना रहेको अध्यक्ष घिमिरेले जानकारी गराउनुभयो । बागमती प्रदेश भित्रका १३ वटै जिल्लाका गरी कुल ३ सय सदस्य संख्या पु¥याउने लक्ष्य संघले लिएको छ । प्रारम्भिक २ सय र ८२  जिल्ला विषयगत संघ, विषयगत प्रदेश संघ सहित कुल ३ सय सदस्य संख्या पुर्याउने लक्ष्य संघको रहेको अध्यक्ष घिमिरेले जानकारी गराउनुभयो । विनियममै ३३ प्रतिशत महिला सहभागिता अनिवार्य गरिएको संघको नवनिर्वाचित समितिमा ५ जना महिला निर्वाचित हुनुभएको छ ।

नवनिर्वाचित समितिको वरिष्ठ उपाध्यक्षमा जगतलाल महर्जन, महिला उपाध्यक्षमा सीता ढकाल, महासचिवमा भीम प्रसाद दाहाल, सचिवमा देवराज न्यौपाने र कोषाध्यक्षमा टीकाराम भट्टराई रहनुभएको छ । त्यस्तै सदस्यहरुमा कृष्ण नेपाल, कृष्णप्रसाद तिमिल्सीना, दीपक जंगम, दुर्गा सञ्जेल, दुर्गा कार्की, अम्बिका थापा, मेनुका दाहाल, बिमल ढकाल र विपिन शर्मा सर्वसम्मत् निर्वाचित हुनुभएको छ । नेत्रराज पौडेलको संयोजकत्व रहेको लेखा सुपरिवेक्षण समितिका सदस्यहरुमा लक्ष्मी गिरी र कुलप्रसाद देवकोटा हुनुहुन्छ ।