गुजरात । भारतको गुजरातमा कला र संस्कृति जर्गेनाको उद्देश्यसहित कला सहकारी गठन गरिएको छ । कलाकारहरुलाई सहयोग पुर्याउने उद्देश्यले गुजरात सहकारी समाज ऐन अन्तर्गत अम्रेली जिल्लामा Shri Kaladhar Multi Credit and Savings Cooperative Society आज स्थापना गरिएको हो । सहकारीले स्थापनाको १ वर्षभित्रमै १ लाख कलाकर्मीहरु सदस्य बनाइ उनीहरुलाई कला संस्कृति सम्बन्धी तालिम तथा वित्तीय सहयोग उपलब्ध गराउने महत्वाकांक्षी योजना अघि सारेको छ । 

स्थानीय सहकारीकर्मीहरुले यो नौलो थालनीको प्रशंसा गरेको भारतीय सञ्चारमाध्यमहरुले जनाएका छन् । कलालाई व्यवसाय बनाउन खोज्ने तथा आफ्ना सन्तानलाई कलाकार बनाउन चाहनेहरुलाई सदस्यता प्रदान गरिने सहकारीले जनाएको छ । देश भित्र र बाहिर कला प्रदर्शनी गर्ने कार्यक्रम अघि सारेको संस्थाले सहकारी सम्बन्धी वृत्तचित्र निर्माणका लागि ऋण सहयोग समेत उपलब्ध गराउने जनाएको छ । राज्यका प्रत्येक जिल्लामा शाखा स्थापनाको लक्ष्य बोकेको सहकारीमा हाल ११ जना सदस्य छन् । सहकारीको पहिलो बैठकमा इफ्कोका सह–अध्यक्ष लगायतका अतिथिहरुले संस्थाको सफलताको कामना गर्नुभएको थियो ।