काठमाडौं । भूमि व्यवस्था, सहकारी तथा गरिबी निवारण मन्त्री पद्मा अर्यालले सहकारीमार्फत उद्यमशीलता विकासको आवश्यकता औल्याउँदै सहकारीमा जम्मा भएको पुँजी रोजगारी विकासका क्षेत्रमा खर्चिनुपर्ने बताउनुभएको छ । यसका लागि सरकारको सहयोग र सहजिकरण रहने विश्वास उहाँले दिलाउनुभयो । “हामीसँग सहकारीका संख्याहरु धेरै छन् । सहकारी आर्थिक रुपमा सबल छ । सहकारीमा भएको पूँजीलाई अब उद्यमशीलता विकासमा लगाउनुपर्छ,” मन्त्री अर्यालले भन्नुभयो,“ व्यावसायिक बन्दै रोजगारी सिर्जनाको विषयलाई राष्ट्रिय सहकारी नीतिमा पनि महत्वका साथ उठाइएको छ ।”  मन्त्री अर्याले सहकारी क्षेत्रलाई उद्यमशीलता र व्यवसायिकतामा लगाउनका निम्ती बाधक ऐनहरुको संशोधन गरेर अगाडी बढ्ने समेत बताउनुभयो । 

संख्यात्मक रुपमा बढेको सहकारीमा सुशासनको विषय पनि उठेको भन्दै उहाँले सहकारी सम्बन्धी विद्यमान कानुन कार्यान्वयमा विशेष जोड दिने उल्लेख गर्नुभयो । ३ वटै तहको सरकारबीच समन्वय गरी सरकार, नीजि र सहकारी क्षेत्रबीच साझेदारी गरेर अगाडी बढ्नुपर्ने भन्दै मन्त्री अर्यालले सबै तह र तप्काबीच सहकार्यको जरुरी रहेको बताउनुभयो । राष्ट्रिय सहकारी विकास बोर्डले निर्माण गरेको सहकारी सम्बन्धी २५ वर्षे रणनीतिक योजनाको मस्यौदा आज मन्त्रालयमा बुझ्दै मन्त्री अर्यालले सहकारी आन्दोलनको बिस्तार, विकास र सुदृढीकरणका निम्ति रणनीतिक दस्तावेज निर्माण गरेको जानकारी गराउनुभयो ।  सहकारी क्षेत्रको विकासको अवस्था, सबल पक्षहरु, प्राप्त उपलब्धिहरु आदि सबै विश्लेषण गरेर राष्ट्रिय सहकारी नीतिको मस्यौदा तयार भएको मन्त्रीले बताउनुभयो । अन्तर्राष्ट्रिय अभ्यास र राष्ट्रिय अवस्थालाई समेत ध्यानमा राख्दै सहकारी क्षेत्रको समग्र विकासका निम्ती स्पष्ट परिकल्पनाका साथ रणनीति तयार गरिएको मन्त्री अर्यालले बताउनुभयो । संविधानले ३ खम्बे अर्थनीतिमा सहकारी क्षेत्रलाई महत्वपूर्ण क्षेत्रको रुपमा लिएको प्रसङ्ग जोड्दै बोर्ड अध्यक्ष समेत रहनुभएकी मन्त्री अर्यालले भन्नुभयो, ‘रणनीतिका विषयमा केही प्रश्न पनि उठेका छन् । यसलाई हामीले कार्यान्वयनमा लैजान कार्यनीति बनाउँछौ । कार्यनीति समय सापेक्ष बन्छ ।’

कार्यक्रममा मन्त्रालयका सचिव टेकनारायण पाण्डेले २५ वर्षमा सहकारी क्षेत्र कसरी अगाडी बढाउने भन्ने परिकल्पनासहित दस्तावेज तयार भएको बताउनुभयो । उक्त रणनीति सरकारले आवधिक योजना, वार्षिक कार्यक्रममा व्यवस्था गर्दै कार्यान्वयनमा लैजाने भन्दै सचिव पाण्डेले सहकारीलाई समाजवादको आधारशिलामा व्यवस्थित गर्दै अगाडी बढाउने बताउनुभयो । राष्ट्रिय सहकारी विकास वोर्डका सह–अध्यक्ष दक्ष पौडेलले सहकारीलाई २५ वर्षभित्र कसरी अगाडी बढाउने भन्ने योजनासहित २५ वर्षे रणनीति तयार गरेको बताउनुभयो । सहकारी क्षेत्रलाई समयसापेक्ष रुपमा प्रविधिमैत्री बनाउदै लैजाने भन्दै सह–अध्यक्ष पौडेलले समग्र सहकारी क्षेत्रको विकासका निम्ती रणनीति तयार गरिएको बताउनुभयो ।