काठमाडौं, भदौ २४ । मोरङको उर्लाबारीस्थित नारी संकल्प बचत तथा ऋण सहकारी संस्थाले सदस्यहरुलाई कोभिड संक्रमणको जोखिम न्यून गर्ने उद्देश्यसहित आज फेस सिल्ड वितरण गरेको छ । 

सदस्य सुरक्षा नीति अन्तर्गत संस्थाका दैनिक बचत गर्ने सदस्य, सुरक्षाकर्मी र बजारमा फ्रन्ट लाइनमा बसेर व्यापार व्यवसाय गरिरहेका व्यक्तिहरुलाई फेस सिल्ड वितरण गरिएको संस्थाका  उपाध्यक्ष एवम् नेफ्स्कून सञ्चालक गोमा नेपालले जानकारी गराउनुभयो । यससँगै संस्थाले कोभिड महामारीका कारण खाद्यान्न जोहो गर्न नसकेका, दैनिक चुल्हो बाल्न नसक्ने सदस्य तथा अन्य व्यक्तिहरुका लागि विभिन्न संघ संस्थासँगको सहकार्यमा फूड बैंक पनि सञ्चालनमा ल्याएको छ । लामो समयको बन्दाबन्दीका कारण दैनिक ज्याला मजदुरी गरेर खाने व्यक्तिहरुमा परेको समस्यालाई मध्यनजर गर्दै संस्थाले स्थानीय संघ संस्था, लायन्स क्लब, जेसिस्, रोटरी क्लब, रेडक्रस सोसाइटीसँगको सहकार्यमा फूड बैंक स्थापना गरिएको जनाएको छ । फूड बैंकबाट प्रत्येक हप्ता आवश्यकताको आधारमा प्रति व्यत्ति ५ केजी चामल, १ केजी दाल, आधा लिटर तेल र १ पोका सोयाविन वितरण गर्दै आएको छ । संस्थाका कर्मचारीहरुबाटै फूड बैंकको प्रभावकारी सञ्चालन हुँदै आएको छ । 

२०६३ सालमा स्थापना भएको नारी संकल्प साकोस महिलाहरुद्वारा सञ्चालित सहकारी हो । २४ सय महिला सदस्यहरु रहेको संस्थाको कुल कारोबार १२ करोड छ । साकोस गुणस्तर सुनिश्चितताको कार्यक्रम प्रोबेशनमा सहभागी यस संस्थाले नेफ्स्कूनद्वारा प्रवद्धित नेकोसप्लस सफ्टवेयर सञ्चालन गरिरहेको छ भने साकोस स्थिरीकरण कोषमा पनि सहभागी भएको छ ।