ओटावा, १२ भदौं । कोभिड–१९ को महामारीले अन्यत्र महादेशहमा झै अफ्रिका महादेश पनि आक्रान्त छ । गरिबीको मारसँगै अफ्रिका अहिले कोभिडको समस्यासँग जुधिरहेको छ । यसरी दुःखमाथि दुःखको वज्रपातलाई केही हदसम्म भएपनि कम गर्न उक्त महादेशका दुई मुलुकहरु इथोपिया र घानालाई उत्तर अमेरिकी महादेशको वैभवशाली राष्ट्र क्यानाडाको एक सहकारीले आर्थिक सहायता उपलब्ध गराउने भएको छ । 

क्यानेडियन सरकारसँगको साझेदारीमा कोअपरेटिभ डेभलेपमेन्ट फाउन्डेशन अफ क्यानाडा (सीडीएफ) ले एक्सेस नामक परियोजनामार्फत इथोपिया र घानाका अति विपन्न ग्रामीण समुदायलाई २ मिलियन अमेरिकी डलर अर्थात् साढे २३ करोड नेपाली रुपैयाँ सहयोग प्रदान गर्ने जनाएको छ । खासगरी कोभिडको महामारी र संक्रमणसँगै अर्थोपार्जनका माध्यम खुम्चिदाँ हातमुख जोड्न समस्यमा परेकाहरुलाई लक्षित गरी सीडीएफले तत्काल उक्त सहायता प्रदान गर्ने बताएको छ ।  उक्त परियोजनामार्फत ती मुलुकका गरिबीको मारसँगै कोभिडबाट प्रभावित १२ हजार ग्रामीण घरपरिवारहरुलाई कृषि कार्यमा आवश्यक सामाग्री, बजार व्यवस्थापन तथा पुँजीको सहयोग उपलब्ध गराइने छ । कृषि उत्पादनको वृद्धिसँगै बजारको पहुँचमा गरिने सहयोगले अन्ततोगत्वा कृषकहरुको आम्दानीमा बढोत्तरी हुने सीडीएफको ठम्याइ छ । 

एक्सेस परियोजनाले स्थानीय बजार बिकासका लागि सहकारीहरुसँग मिलेर अल्पकालीन खाद्य सुरक्षाका उपायहरु अबलम्बन गर्न सहयोग गर्ने छ । त्यसका लागि कोभिडको समयमा करेसाबारी खेती (किचन गार्डन), उत्पादन भित्राउने बेलामा हुने क्षति न्यूनीकरणका उपायहरु तथा भन्डारण सहजताका लागि परियोजनाले सहयोग गर्नेछ ।